Andra Mariaren eliza nagusia tenplu gotiko-errenazentista bat da, Mundakako talaiaren muinoan kokatuta dagoena. Eraikina askotan berritu dute: XVI. mendean berreraiki eta handitu egin zuten, 1446. urtean Butroeko Gomez Gonzalez jaunak borroka banderizoetan suntsitu ondoren; elizaren ondoan zegoen dorretxeari ere, munakatarren dorretxeari, horixe gertatu zitzaion. XVII. mendean eraberritze-lanak egin zituzten berriz, eta elizaren egungo estetika aldatu zuten. XIX. mendean beste aldaketa bat egin zioten eta gaur egun ezagutzen dugun bezala utzi zuten. Historian, XI. mendeaz geroztik daude eliza nagusi horri buruzko aipamenak, 1071. urteko dohaintza-dokumentu batean jasotzen denaren arabera. Dokumentu hori Aragoiko San Miguel de la Peña monasterioan dago.
