Tribisburuko aztarnategi erromatarra 500 metroko altitudean dago, Sollube mendiaren hegalean, eta Kristo ondorengo I. mendearen eta III. mendearen artekoa da. Bizkaian aurkitu den errausketa-nekropoli bakarra da eta 15 metro karratu inguruko azalera duten lau angeluko gela txikiek osatzen dute. Gela horietan, bertan hilobiratutako pertsonen errautsak eta gauzak aurkitu ziren. Dirudienez, nekropolia hurbileko egonleku batena zen; Bermeoko Tribisekoa edo Demigusekoa, adibidez.
