Ajangizko Kanpantxu auzoaren ibarrean dagoen jauregi handientsua. Egungo eraikina zaharberrituta dago. Antza denez, udalerriko burdinola garrantzitsuena egon zen eraikin horretan, eta handik hurbil zegoen Goikoerrota burdinolarekin batera multzo protoindustriala osatu zuen. Olaeta-arestietatarrek eraiki zuten, XVII. mendean. Francisco Ignacio Olaeta eta Arestieta eta haren semea, Juan Olaeta Arestieta eta Trobika, eraikin horretan jaio ziren; biak Bizkaiko Jaurerriko ahaldun nagusi izan ziren. Jauregi barrokoa da eta San Joan lepogabetuari eskainitako kapera bat du. Jatorrizko familiak jauregia utzi zuenean, baserri bihurtu zen.
